Sa isang lugar na tinaguriang mala-paraiso dahil sa kagandahan ng kalikasan, matagal nang hinahangad ng mga residente ng Sitio Ilaya Small Upper, Dona Juana ang isa pang pangarap—ang pagkakaroon ng kuryente. Ito ang magbibigay liwanag hindi lamang sa kanilang mga tahanan kundi pati na rin sa kanilang buhay at pag-unlad.
Noong Agosto 13, 2024, naganap ang isang mahalagang pagtitipon sa komunidad, Dinaluhan ito ni Brgy. Captain Elizabeth Mindo, kasama ang mga opisyales ng BAPA na pinangunahan ni Bapa Chairman Anicito P. Mijares. Sa harap ng lahat, nagbigay ng inspiradong mensahe ang ating San Agustin District Director Khaled Morada. Ipinahayag niya ang kanyang pagkilala sa pagsisikap ng mga mamamayan, na sa kabila ng malalayong bundok at ilog, ay nagpupursigi pa rin para sa kanilang adhikain.
Hindi biro ang paglalakbay patungo sa Sitio Ilaya. Dalawang bundok at walong ilog ang kailangang tawirin upang maabot ang lugar. Ito ang kanilang araw-araw na realidad—isang hamon na kanilang tinatanggap ng may tapang at tiyaga. Subalit, ang lahat ng ito ay pinapawi ng pangarap na balang araw, magliliwanag din ang kanilang mga tahanan.
Isang miyembro ng komunidad ang nagwika, “Kapag may tiyaga, may nilaga.” Tunay nga, ang tiyaga ay kanilang sandigan. Sa kabila ng hirap, patuloy silang naglalakad, tumatawid ng ilog, at nagsusumikap upang makamtan ang kanilang pangarap.
Ang araw na iyon ay hindi lamang isang pagdiriwang, kundi isang pagsasabuhay ng kanilang paniniwala na ang lahat ng bagay na pinagsisikapan ay may magandang kapalit. Ang liwanag na kanilang pinapangarap ay magsisilbing simbolo ng kanilang walang patid na determinasyon at pagkakaisa.
At ngayon, unti-unti nang nagiging realidad ang pangarap na ito. Ang Bapa Ilaya Small Upper, Dona Juana ay nagiging isang komunidad na may ilaw—isang ilaw na hindi lamang nagmumula sa kuryente, kundi sa puso ng bawat isa na patuloy na lumalaban para sa kanilang kinabukasan.
SOURCE: FACEBOOK